Monday, October 20, 2014

ඉසුරු පිරි යුගයකට නැනෝ තාක්ෂණය 02

0 comments
නැනෝ තාක්ෂණයෙහි ඉතිහාසය හා නැනෝ වෛද්‍ය විද්‍යාව

නැනෝ තාක්ෂණය ගැන පවසද්දී එහි ඉතිහාසය පිළිබඳව දැන ගෙන සිටීම වැදගත්. කොයි දේකත් ඉතිහාසය දැනගෙන ඉන්න එක වටිනවනේ. ඒ හින්දම නැනෝ තාක්ෂණය ගැන මගේ දෙවැනි ලිපියෙන් එහි ඉතිහාසය ගැන ඔයාලව දැනුවත් කරන්න හිතුවා. පළවෙනි ලිපිය බැලුවෙ නැත්නම් මෙතනින් බලන්න.

 නැනෝ තාක්ෂණය පිළිබඳව මුලින්ම සඳහන් කළේ රිචඩ් ෆේමන් කියන භෞතික විද්‍යාඥයා. මේ ඉන්නේ එතුමා තමයි.
1959 කැලිෆෝනියාවේ විශ්වවිද්‍යාලයකදී එතුමා යටි පැත්තේ තවත් බොහෝ ඉඩ ඇත යනුවෙන් දේශනයක් කළා. පරමාණු අණු රැස් කරලා විවිධ නිර්මාණ කරන්න පුළුවන් බව එතුමා ප්‍රකාශ කළා. ස්වභාවිකව තිබෙන ජීව විද්‍යාත්මක පද්ධති පුංචි වුනත් කාර්‍යශීලී නිසා මිනිසාට කුඩා ප්‍රමාණයේ පුදුම හිතෙන නිර්මාණ කරන්න පුළුවන් කියලා එතුමා එදා ප්‍රකාශ කළා. මෙතුමා නොබෙල් ත්‍යාගයෙන්ද පිදුම් ලැබූ කෙනෙක්. 

නැනෝ තාක්ෂණය පිළිබඳ මුලින්ම ප්‍රකාශ කලේ මෙතුමා උනත් නැනෝ තාක්ෂනයේ පියා ලෙස හඳුන්වන්නේ නම් මෙතුමා නෙමෙයි. 



ආ.... එහෙනම් කව්ද ඔය කියන නැනෝ තාක්ෂණයේ පියා.. ?? 


මේ ඉන්නේ එතුමා තමයි..     
මෙතුමාගේ නම තමයි සුප්‍රකට විද්‍යාඥ ,මහාචාර්ය එරික් ඩෙක්ස්ලර්.  1987 දී මෙතුමා "නිර්මාණයේ යන්ත්‍ර -අනාගත නැනෝ තාක්ෂණ යුගය" කියන නමින් කෘතියක් පළ කළා. මේ කෘතිය නිසා ගොඩක් අය නැනෝ තාක්ෂණය පිළිබඳ අනාවැකි කියන්න පටන් ගත්තා. නොයෙක් මති මතාන්තර ඇති වුනා.
 
නැනෝ කියලා කිව්වම එහෙමත් නැත්නම් නිණිති කියලා කිව්වම අපිට හිතෙන්නේ මේක මේ ඊයේ පෙරේදා හොයා ගත්තු තාක්ෂණයක් කියලනේ. ඒත් මේ නැනෝ තාක්ෂණයේ ඉතිහාසය ක්‍රි.ව  4 වන ශත වර්ශය තරම් ඈතට ගෙනයනවා. අවුරුදු 50 කටත් වැඩි ‍ඓතිහාසික සොයාගැනීම් තමයි අද අපි නැනෝ තාක්ෂණය කියලා හඳුන්වන්නේ.

 ක්‍රි.ව 10 වන ශත වර්ශයේදී පවා නැනෝ පරිමාණයේ රත්තරන් යොදාගෙන නොයෙක් නොයෙක් නිශ්පාදන කළා කියලා වාර්තා වෙනවා. හිතා ගන්නවත් බෑ නේ ? ඒත් ඉතිං මේ ලඟදිනේ නැනෝ පරිමාණයේ අංශු දකින්න පුළුවන් අන්වීක්ෂ හොයගත්තේ. 

මං කලින් කිව්වනේ නැනෝ තාක්ෂණයේ ඉතිහාසය ක්‍රි.ව  4 වන ශත වර්ශය තරම් ඈතට ගෙනයනවා කියලා. ඒකට උදාහරණයක් තමයි මම දැන් පෙන්නන්න යන්නේ. ඒ තමයි Lycurgus cup එක. 

මේ කොළ පාට බඳුනට ආලෝකය වැටුනම රතු පාටින් තමයි පෙන්නන්නේ. මෙහෙම වෙන්නේ බඳුනේ තියන රත්තරං නැනෝ අංශු නිසාලු. විස්වාශ නැත්නම් මේකත් බලලම ඉන්නකෝ.


 


නැනෝ වෛද්‍ය විද්‍යාව


එහෙනම් දැං අපි බලමු මේ නැනෝ තාක්ෂණය කොහොමද වෛද්‍ය විද්‍යාවට බලපාන්නේ කියලා. මේ පිළිබඳ යම් කිසි දැනුමක් මගේ පළවෙනි ලිපියෙහි තිබුණු වීඩීයෝ එකෙන් ලැබෙන්නට ඇති කියලා මම විශ්වාශ කරනවා.  ඉතිං මේ පිළිබඳව කෙටියෙන්ම කිව්වොතින් රෝග විනිශ්චය, රෝග වැළැක්වීම සහ ප්‍රතිකාර කිරීම වගේ අංශවල අති විශාල පෙරලියක් සිද්ධ වේවි. දියවැඩියා මර්ධනය කරන්න පිළිකා රෝග සුව කරන්න කෘතිම අස්ථි නිපදවන්න අනිවාරෙන්ම පුළුවන්කමක් ලැබෙනවා. අනාගතේදී නැනෝ තාක්ෂනික උපකරණ නිසා අපගේ ශරීරයේ සියළු පරීක්ෂාවන් සාම්පල් පරීක්ෂාවක් කරන්නේ නැතුවම ගෙදර ඉඳන්ම වෛද්‍යවරයාට දැනුම් දෙන්න හැකියාවක් ලැබෙනවා. නියමයි නේ.. :)

 ඒත් ඉතිං මේවගෙන් අන්තිමට වෙන්නේ මිනිස්සුන්ව තව තවත් කම්මැලිවෙන එකයි, ලෙඩ වෙන එකයි, ආයුෂ කෙටි වෙන එකයි තමයි. :( . 

 වෛද්‍ය විද්‍යාෙව් ලොකුම පෙරළිය තමයි ඇඟ ඇතුලේ තියන වෛරස් රෝගාදිය නැතිකරන්න ඇඟ ඇතුළෙම දුවන්න නැනෝ රොබෝවරු යොදවන එක.


කොහොමද මේ වගේ රොබෝලා ඇඟ ඇතුලේ දුවනකොට.. මොවුන් භාවිතයෙන් පිළිකා සෛල විනාශ කරන්නත් ස්වයංක්‍රීයව ශල්‍ය කර්ම කරන්නත් හැකියාව පවතිනවා.

එහෙනම් නැනෝ තාක්ෂණය පිළිබඳව තවත් බොහෝ දේවල් එක්ක ඊලඟ ලිපියෙන් හමුවෙමු යාළුවනේ.. හැමෝටම තෙරුවන් සරණයි.. !













.

Sunday, October 19, 2014

වැරදි ඇතොත් කියා දෙන්න. මං කැමතියි හදා ගන්න

2 comments
ඔයා සර්ව සම්පූර්ණද ? මේ ලෝකයේ සර්ව සම්පූර්ණ වෙන්න අපි හැමෝටම බැහැ. ඔයා හිතනවද ඔයා වැරදි කරන්නේ නැති කෙනෙක් කියලා.. ? "මම නම් වැරදි කරලත් නෑ. ඒ නිසා මම කාටවත් භයත් නෑ." මෙහෙම කිය කිය වැරදි කරන අය සමාජේ කොච්චර ඉන්නවද ? ඔයත් එහෙම කෙනෙක්ද ?? හැබැයි ඉතිං කථාව නම් ඇත්ත. වැරදි කළේ නැතොත් භය වෙන්න ඕනේ නෑනේ. මැරෙන්නවත් භය වෙන්නේ නෑ එහෙම මිනිස්සු. මැරෙන්න භය වෙන්න ඕන වැරදි කරන මිනිස්සුයි. 

ඇත්තටම වැරදි කරන්නේ නැති කෙනෙක් මේ ලෝකේ නෑ. අපි හැමදෙනාගෙම අතින් වැරදි වෙනවා. මගේ අතිනුත් වැරදි වෙනවා. හාමුදුරුනමක් වුනා කියලා රහත් වෙලා නෑනේ. හැබැයි ඉතිං අපේ ගොඩක් මිනිස්සු හිතං ඉන්නේ සිව්ර දාගත්තු ගමන්ම රහත් වෙනවා කියලා. හැමතැනම හොයන්නේ හාමුදුරුවුරුන්ගේ වැරදි විතරනේ. හොඳ හොයන්නේ නැහැනේ. 

ඇත්තටම එහෙම වැරදි හොයන්නේ හාමුදුරුවරුන්ගේ විතරමද ? නැහැ. අපි වටා ඉන්න අය බොහො දෙනෙක් අපේ හොඳ දේවල් නෙමෙයි හොයන්නේ. අපේ වැරදිමයි හැම කෙනාටම පේන්නේ. මේක ලෙඩක් වගේ හැමතැනම බෝ වෙලා. ඔබේ පෙම්වතිය හෝ පෙම්වතා ගැන හිතන්න. ඔයාට පෙනෙන්නේ ඇයගේ/ඔහුගේ  වැරදි පමණද ? ඇයගේ හෝ  ඔහුගේ එක හෝ හොඳක් ඔයාට දකින්න පුළුවන්නම් ඒ හොඳ ඔයාට අගය කළ හැකි නම් එය වැරදි විවේචනය කරනවාට වඩා හොඳයි. තිබෙන එක හොඳ ගතිගුණය අගය කිරීම නිසා සමහරවිට ඔහු හෝ ඇය ඇති වැරදිත් හදා ගනීවි. හැම ඝන වළාකුලකම රිදී රේකාවක් ඇත කියලා කියනවනේ. ඒ වගේම ඕනම වැරදි කරන පුද්ගලයෙක්ගේ හොඳ ගතිගුණ තියනවා. අන්න ඒ හොඳ ගතිගුණ ඔහු/ඇය ඉදිරිපිටම අගය කරන්න පුරුදු වෙන්න. එතකොට ඔහු/ඇය හොඳට හැදෙන්නත් පුළුවන්.

ස්වභාවයෙන්ම ඔයාට පෙනෙන්නේ අනුන්ගේ වැරදිය. අනුන්ට පේන්නෙත් ඔයාගේ වැරදිය. ඔයාගේ වැරදි දකින අය ඒ වැරදි මොනවාදැයි ඔයාට කියන්නේ නැති වෙන්න පුළුවන්. එහෙම කියන අයත් ඉන්නවා. නමුත් ඔයා නැති වෙලාවල්වල ඒ වැරදි අනුන් එක්ක කියවන අය තමා ගොඩක් ඉන්නේ. එහෙම වෙන්නේ ඔයා ඔයාගේ වැරදි අන්‍යයන් කියනවාට අකමැති හින්දා වෙන්නත් පුළුවන්. ඔවුන් ඒ වැරදි ඔයාට පෙන්නල දෙන්න තරම් අවංක වෙනවානම් කොච්චර හොඳද. ඔයාට පෙනෙන ඔයාගේ වැරදි මොනවද කියලා ඔයා අනික් අයගෙන් අහන්න. ඒවා අහන්න කැමතියි කියලා ඒ අයට කියන්න. සමහර වෙලාවට ඒ අය ඔයාට කියන දේවල් ඔයාගේ වැරදි නොවෙන්නත් පුළුවන්. එහෙම වුනත් ඔවුන් කියන්නේ මොනවද කියලා අවංකව අහගෙන ඉන්න. ඒ වගේම ඔයාගේ වැරදි තියනවනම් ඒවා හදාගන්න උත්සහ කරන්න. අනික් අයගේ වැරදි තියනවනම් ඒවා පෙන්වලා දෙන්න කරුණාවෙන්. ගහන්න බනින්න යන්න එපා. ඔයා පෙන්වල දෙන වැරැද්ද සමහරවිට නිවැරදි නොවෙන්නත් පුළුවන් කියලත් කියන්න. ඔයාට ඕන විදියට එයා වෙනස් වෙන්න ඕන කියලා හිතන්න එපා. වැරදි පෙන්නලා දෙන්න. ඒක ඔයාගේ යුතුකමක්. අපිත් අපේ වැරදි ටිකෙන් ටික හදාගන්න උත්සහ කරමු. ටිකෙන් ටික හොඳ පුරුදු වැඩි කරගමු. 

අපි වැරදි කරන්න ලැජ්ජා වෙන්න ඕන. භය වෙන්න ඕන. තුන් දොරම සංවර කරගන්න පුළුවන් එතකොට. නැත්නම් වෙන්නේ ජීවිතේ අවසාන කාලේදි පසුතැවිලි වෙන්නයි. තමන්ගේ අතින් සිදුවුනු වැරදි මතක් කර කර හූල්ලන්න වේවි. මැරෙන්න භය වැඩි වේවි. යමක් කරන්න කළින් ඒ පිළිබඳ නැවත හිතලා කටයුතු කරමු. තමන්ටත් අනුන්ටත් වැඩක් වෙන දෙයක් කරන්න හැම වෙලාවකම උත්සාහ කරමු. හැම කෙනාගෙම නරකට වඩා හොඳ දකින්න පුරුදු වෙමු. ඒවා ඔහු/ඇය ඉදිරිපිටම අගය කරන්න පුරුදු වෙමු. පුළුවන් විදියට හැමෝටම උදව් කරමු. හැමොටම තෙරුවන් සරණයි.....!!! 

අදහසක් දාලා ගියොත් තමා හොඳ. අහක බලං යන්නේ නැතුව.

Saturday, October 18, 2014

වරුවක් පොරේ තණ දෙක හරවා ගන්ඩ...

7 comments
අපේ රටේ තියන බෝගයන් අතර තණ කරල් වලට හිමි වෙන්නේ අද්විතීය ස්ථානයක්. මේ ෆොටෝ එකේ නම් තියෙන්නේ තණ කෙතක් නෙමෙයි. ෆොටෝ එකක් හොයාගන්න බැරිවුන නැසයි දැම්මේ. තණ හාල් වලින් තණ බත් හදනවා.. හරිම රසයිලු. අනේ ඉතිං මම නම් කාලා නෑ :( 
ඒ වගේම තණ හාල් වලට මුං ඇටයි පොල් කිරියි එකතු කරලා නියම කිරිබතක් හදාගන්නත් පුළුවන්. පෝෂණ ගුණයෙන් නම් ඉහළයි. මේවා ඉක්මනින් දිරවනවා. ඒ නිසාම රෝගීන්ට ගොඩක් හොඳයි. ඒ වගේම මේවගෙන් හදන කැඳ සර්ප විශටයි,කැඩුමි බිඳුම් තුවාලවලටයි ගොඩක් ගුණයි. 

ඒ වගේම මේ කැඳ මව් කිරි නැති දරුවන්ටත් දෙන්න පුළුවන්. කිරි ඌනතාවය මේ කැඳවලින් මඟ හැරෙනවලු. ඔව් ඉතිං ඒක එහෙම වෙන්නත්  එපැයි, "ණ" අකුරෙ වෙනස විතරයිනේ තියෙන්නේ. හි හි...
කොහොම වුනත් වකුගඩු රෝග, මුත‍්‍ර රෝග, රුධිර පීඩනය, ග‍්‍රහනි රෝග ආදි සියල්ලටම සුදුසු සැහැල්ලූ ආහාරයක් විදියට තණ හාල්වලින් හදපු ආහාර ඉතා වැදගත් වෙනවා. ශරීරයේ අස්ථි වර්ධනය කිරීමටත්, බිඳුණු අස්ථි යා කිරීමටත් තණ හාල්වලට විශේෂ හැකියාවක් තියෙනවා.  

එහෙනම් දැං අපි මේ හා බැඳුනු කථාවකුත් අහමුකෝ...
ඔන්න එක්තරා හාමුදුරුනමක් (ඔන්න මම නම් නෙමෙයි) පිඬු සිඟා වඩින්න තණ කෙතක් මැදින් වැඩියා. යන පාර බොහොම පටුයි.. ඉතිං තණ කරල් පාරට නැමිලා තිබුණේ. දැං ඉතිං දානේ වෙලාව පහු වෙන්න කලින් ගමට යන්නත් එපැයි. හාමුදුරුවො කොහොමහරි තණ කරල් දෙපැත්තට කර කර යාංතං ගමට වැඩියා. දානේ වෙලාවත් පරක්කු නිසා ගමේ අය ඇහුවා මොකො හාමුදුරුවනේ පරක්කු කියලා. ඉතිං හාමුදුරුවො කවියකින්ම මෙහෙම පිළිතුරු දුන්නා.

සරුවත් කෙතේ බිජු වපුලේ පැළ     වෙන්ඩ
මැරුවත් බැරිය දුටු දෙය නොකියා     ඉන්ඩ
බොරුවක් නොවේ මට ජාතියේ   කඹුරන්ඩ
වරුවක් පොරේ තණ දෙක හරවා      ගන්ඩ

 එහෙනම් මාත් ඔන්න වැඩියා... හැමෝටම තෙරුවන් සරණයි.. අදහසක් දාලා ගියොත් තමා හොඳ. ඒත් ඉතිං කව්රුත් දැකලා නොදැක්කා වගේ යනවනේ.. 


හතරවෙනි ඇංජිම

0 comments
ඔන්න ගුවන්යානයක් අහසෙ පියාසර කර කර තිබුණා. හදිස්සියෙන්ම ගුවන් නියමුවා මගීන්ව ඇමතුවා.

"අපේ යානයේ එක එංජිමක් ක්‍රියා විරහිත වුනා. ඒත් භය වෙන්න දෙයක් නෑ අපට තව එංජින් තුනක් තියනවා ඒත් අපිට ලංකාවට යන්න තව පැයක් වැඩිපුර පරක්කු වේවි."

ඔන්න මෙහෙම කියපු ගුවන් නියමුවා පැය භාගෙකට පස්සේ ආයෙත් මෙහෙම කියනවා.

"තවත් එංජිමක් ක්‍රියා විරහිත වුණා. ඒත් කලබල වෙන්න එපා. අපිට තව එංජින් දෙකක්ම තියනවනේ. හැබැයි ලංකාවයට යන්න තව වැඩිපුර පැය දෙකක්වත් යාවි"

ඔන්න බොලේ ඊටත් විනාඩි 10කට පස්සේ ආයෙත් ගුවන් නියමුවා මගීන්ව ඇමතුවා.

"ඔබ කලබල වෙන්න එපා. අපේ තුන්වෙනි ඇංජිමත් ක්‍රියා විරහිත වුණා. ඒත් තනි එංජිමෙන් ගමන ඉවර  කරන්න පුළුවන් වේවි. කොහොම වුනත් ගමන ඉවරකරන්න තව පැය 3ක් වත් යාවී"

මේ වෙලාවේ එක මගියෙක් හොඳටම කළබල වුණා.
"හත්වලාමේ ඊළඟ ඇංජිමත් නතරවුනොත් අපට මුළු රෑම ඉන්න වෙන්නේ අහසෙ තමා"
:)

සිදුහත් තවුසාණන් දුටු සිහින පහ අපගෙත් සිහින කරගමු

0 comments

 1.එතුමන්ට මහ පොළව යහනාවක් විය. හිමාල පර්වතය කොට්ටයක් විය. එහි උඩුකුරුව නිදාගත් එතුමාගේ දකුණත අවරදිග සයුරේද වමත පෙරදිග සයුරේද පිහිටා තිබුණි. 
(සත්‍ය සොයා ජයගන්නා බව)

2. බෝසතාණන් වහන්සේගේ නාභියෙන් රතු ඊතන ගසක් පැන නැගී අහසෙහි විහිද පැතිර ගියේය.
    (සොයාගත් සත්‍යය ලොවට ප්‍රකාශ කරන බව)

3. කළුවන් හිස් ඇති පනුවෝ එතුමාණන්ගේ පාමුල සිට දෙදෙණ තෙක් වසා සිටියහ.
    (ගිහි අනුගාමිකයන් බොහෝ දෙනෙකු ඇති බව)

4. නොයෙක් පැහැයෙන් යුත් ලිහිණියන් සතර දෙනෙක් සිව් දෙසින් පියඹා අවුත් එතුමාණන්ගේ පාමුල වැටී සුදු පැහැයක් ගත්හ. (සිව් කුලයටම අයත් ජනයා අනුගාමිකයන් වන බව)

5. එතුමාණෝ විශාල අසූචි පර්වතයක් මත එහි නොගෑවී සක්මන් කළහ.
    (ලැබෙන සත්කාර කෙරෙහි ගිජු නොවන බව)


හැමදෙනාටම සම්මා සම්බුදු සරණයි... !

Thursday, October 16, 2014

සිංහල ජාතිය සහ බුදු දහම

0 comments
අද වෙනකොට අපේ සම්බුද්ධ ශාසනය සහ සංස්කෘතිය බොහෝ ලෙස සෝදාපාළුවට ලක්වෙලා. ආත්මාර්ථය උදෙසා කටයුතු කරන්න පෙළඹිලා ඉන්නේ ගිහි ජනතාව පමණක්ම නෙමෙයි. සමහර භික්ෂුන් දැන් ආත්මාභිවෘද්ධිය උදෙසා කටයුතු කරන්න පටන් අරන්. මේ සම්බුදු සසුන භාරව ඉන්නේ භික්ෂුව පමණක් නෙමෙයි. සිව්වනක් පිරිසම අප සම්බුදු සසුන ආරක්ෂා කිරීමට කටයුතු කළ යුතුයි. බුදු සසුන විනාශ වෙද්දි කට බඩ පියාගෙන ආත්මාර්ථය පිණිස කටයුතු කරන බෞද්ධයන් දැන් වැඩි වෙලා. අන්න ඒ හින්දම තමයි මට මේ වගේ ලිපියක් ලියන්න හිතුනෙ.
අද හැමොම කථා කරන දෙයක් තමයි මේ සිංහල ජාතියේ විනාශය ගැන. සමහරු බොහොම විරුද්ධයි භික්ෂුව අපේ ජාතිය පිළිබඳව සිතා වැඩ කටයුතු කිරීම පිළිබඳව. ඒ හැම දෙනාගෙන්ම මම අහන්නේ එකම එක ප්‍රශ්ණයයි... සිංහල ජාතිය විනාශ වුවහොත් බුදු දහහමක් මේ හෙළදිව ඉතුරු වෙයිද ?  අන්න ඒ නිසා සම්බුදු සසුන ගැන කථා කරද්දි අපට අපේ ජාතිය ගැන කථා නොකර බැහැ. අපේ සිංහල ජාතිය ගැන කථා කරද්දි අපට අපේ සම්බුදු සසුන ගැන කථා නොකර බැහැ. ඒ තරම් අපේ ජාතියයි අපේ ආගමයි අපේ ලේ මස් නහරවලට කා වැදිලා. 

මෙහෙම අපේ ජාතියත් ආගමත් සංසකෘතියත් විනාශ වී ගෙන යන කාලේ බඩ කට පියාගෙන සිටින භික්ෂූන් වහන්සේලා අද පමණක් නෙමෙයි එදත් හිටියා. ඒ හාමුදුරුවෝ නිකම්ම කෙනෙක් නෙමෙයි රහත් හිමි නමක්. 

මිලිඳු රජ්ජුරුවෝ ගැන ඔයාලා ටිකක් හරි දන්නව ඇතිනේ. මිලිඳු කියන්නේ බොහෝ දැනුමැති සහ වාග්චාතූර්යයෙන් පිරිපුන් කෙනෙක් ඒ වෙනකොට මෙතුමා සමඟ වාද කළ හැකි කිසිම භික්ෂුවක්වත් ගිහියෙක්වත් හිටියෙ නැහැ. ඉතිං එවකට රහතුන් වහන්සේලා පවා වැඩවාසය කළත් මෙතුමා එක්ක වාද කරන්න තරම් වාග්ශක්තියක් ඒ කිසිම රහත් හිමිනමකට තිබ්බේ නැහැ.මිළිඳු රජ්ජුරුවෝ කළේ අපේ භික්ෂුන්වහන්සේලා අපහසුතාවයට පත් කරපු එකයි. මෙන්න මෙහෙම කාලෙක තමයි මේ පිළිබඳව සාකච්ඡා කරන්න භික්ෂුහූ එක්රැස් වුනේ. 
ඒත් මේ අවස්ථාවට රෝහණ මහ රහතන් වහන්සේ වැඩියේ නැහැ. උන්වහන්සේ හිමාල පර්‍වතයෙහි සිටිමින් නිරොධ සමාපත්තියට සම වැදිලා වැඩ සිටින බව දැනගන්නට ලැබුණා. අස්සගුත්ත මහ රහතන් වහන්සේ උන්වහන්සේව කැඳවන්න දූත හිමිනමක් යවන්න හදද්දී ඒ බව කල් තියාම දැනගත් රෝහණ තෙරණුවෝ සෘද්ධියෙන්ම එතනට වැඩියා ඒ අවස්ථාවෙහි අස්සගුත්ත මහරහතන් වහන්සේ රෝහණ මහතෙරුන්ව ඇමතූ හැටි (මිලින්ද ප්‍රශ්ණය- බෞද්ධ සංස්කෘතික දෙපාර්තුමේන්තුවෙන් පළ කළ පොතෙහි- පිටු අංක 14)  මේ විදියට දැක්වෙනවා. 

"කිමෙක්ද ඇවැත්නි, රෝහණ ස්ථවිරයෙනි, බුද්ධ ශාසනය පසු බැස විනාශ වන කල්හි සංඝයා විසින් කළමනාකටයුතු නුදුටුයෙහිදැ"යි විචාල සේක. "

ශාසනය විනාශ වෙද්දි නිරොධ සමාපත්තියට සමවැද සිටීම නිසා අස්සගුත්ත මහරහතුන් විසින් රෝහණ තෙරුන්ට දඬුවම් පමුණුවනු ලැබුවා. කථාවේ තව ගොඩක් තියනවා ඒ පොත අරගෙන කියවන්නකෝ.

අද ඊටත් වඩා නරක කාලයක් එළඹිලා. සිංහල ජාතිය වඳ වෙමින් බුදුදහම සමඟ බැඳුනු අපේ සංස්කෘතිය විනාශ වී ගෙන යනවා. සිංහලයා පක්ෂ පාට ,කුලමල වලට බෙදිලා වෙන්වෙලා. සිංහලයා නැතිකරන්නේ සිංහලයමයි. කවදහරි සිංහලය එකතු වෙන්නේ, සිංහලයා මේ රටේ සුළු ජාතිය වුන දාට. අර ඥානසාර හාමුදුරුවෝ කියනවා වගේ අපි දැන් ජාතක පොත ටිකකට පැත්තකින් තියලා ජාතිය ගැන හිතමු.ඒ කියන්නේ ජාතක පොත පැත්තකට දාන එක නෙමෙයි. අපි දැන් ජාතිය ගැන හිතන්න ඕන කාලේ ඇවිත්. අපේ ආගම තියෙන්නේ ජාතිය රැකුනොත් විතරයි. අපි ඇත්තටම අනික් ආගම් වලට අනික් ජාතීන්ට ගරහනවට වඩා කරන්න ඕන අපේ ආගම සහ අපේ ජාතිය නැගිට්ටවන්න කටයුතු කරන එක. සිංහල ජනයා වැඩිකරන්න වැඩකටයුතු කරන එක. සිංහලයා සමඟි කරවන්න කටයුතු කරන එක. 

 අපි අපේ ආගමට ආදරය කරමු. අපි අපේ මව් රටට අදරය කරමු. අපි අපේ ජාතියට ආදරය කරමු. ඒ වගේම අන් ආගම් සහ අන් ජාතින්ට ගරහනවට වඩා අපේ ජාතිය නඟා සිටුවන්න වැඩ කරමු. පාට පක්ෂ වලට වෙන් වෙලා කුල මල නිසා භේද භින්න නොවී ඉමු. අපි එකම එක ජාතියක් විදියට නැගී සිටින්න හැම පැත්තෙන්ම උත්සහ ගමු. සල්ලි තියන සිංහල මිනිසුනේ නුඹලා දරුවන් වැඩි වැඩියෙන් හදව්.  හෙළ දරුවන් රැසක් සිටින එහෙත් දුප්පත් වූ පවුල්වලට අත හිත දෙමු. ගමෙන් පන්සලට වගේම පන්සලෙන් ගමටත් වැඩ කරමු.

 ඔයාලා හැමෝටම බුදු සරණයි.

මිය ගිය ඥාතීන්ට පිං දීමට නියම වූ දිනයන් ඇත්ද ?

0 comments
අපේ පන්සලට එන දායක ඇත්තන්ගෙන් සමහරුන්ට තියන ලොකුම ප්‍රශ්ණයක් තමයි කෙනෙක් මිය ගියාට පස්සේ හත්දවසෙන් තුන්මාසෙන් අවුරුද්දෙන් පින්කම් කරනවනේ. අන්න ඒ පිංකම් හරියටම ඒ දිනේටම කරන්න ඕනද කියන එක. හරියටම ඒ දිනේටම පිංකම කරගන්න බැරි වුනොත් දායක ඇත්තො තදබල විදියට සිත් තැවුල් ඇති කරගන්නවා. සමහරු හාමුදුරුවරු එක්ක රණ්ඩුත් වෙනවා. 

ඇත්තටම ඇයි මේ කෙනෙක් මිය ගියාම හරියටම හත් දවසකින් පිංකම් කරන්නේ...?

හත් දවසින් විතරක් නෙමෙයි.. තුන්මාසෙන් ,අවුරුද්දෙන් මේ කරන හැම පිංකමක්ම මිනිස්සුන්ම හදාගත්තුවා. බුදුහාමුදුරුවෝ කවදාවත් දේශනා කළේ නැහැ අහවල් අහවල් දිනේට මිය ගිය අයට පිං දෙන්න කියලා. ඒ නිසා එදාටම දෙන්න ඕන කියලා දෙයක් නැහැ. හදිස්සියක් වුනොත් දින පහුවෙලා දුන්නත් ප්‍රශ්ණයක් වෙන්නේ නැහැ. මැරිච්ච කෙනාගේ ආත්මය සතියක් ගෙදර තියනවලු. හත් වෙනි දවසෙලු ඒ ආත්මය ගෙදරින් යන්නේ. ඒක නිසා හත්වෙනි දවසේ දානයක් දීලා ඥාතිවරයට පිං දුන්නොත් එයා යහපත් ආත්මයක උපදියිලු. මෙන්න මේ වගේ අන්‍යාගමික මත බෞද්ධයෝ විසින් පිළිගත්තු නිසා තමයි අද බුදු දහම විකෘති වෙලා තියෙන්නේ.
                                                           

ඒ නිසා ඔබට කැමති දවසක මිය ගිය අය වෙනුවෙන් පිංකම් කරන්න. මැරිච්ච කෙනා පිං ගන්න පුළුවන් තැනක ඉන්නවා නම් පිංකම් කවදා කරත් එකයි. පිනේ වෙනසක් සිද්ධ වෙන්නේ නැහැ. කොහොමින් කොහොමහරි මේ පිංකම් කරන්න දින නියමයක් ආපු එකේ වැරැද්දකුත් නැහැ. මොකද එහෙම දින නියමයක් තිබුණෙ නැත්නම් අද වෙනකොට එහෙම පිංකම් කරන අය හොයාගන්නවත් නැතිවෙනවා. මොකද අද බොහෝ අය බණක් අහන්නේ දානයක් දෙන්නේ තමන්ගේ කෙනෙත් මැරුණු දවසක විතරයි. හදිස්සියෙන් තැනක තමයි හේතුවක් නැතුව පිංකමක් කරන්නේ. ඒ නිසා ඉදිරියටත් දින හතෙන් ,තුන් මාසෙන්, අවුරුද්දෙන් පිංකස් කිරීමෙහි වරදක් නැහැ. ඒත් යම් යම් හේතු නිසා ඒ දිනේටම පිංකම කරගන්න බැරිවුනා කියලා කිසිම දවසක සිත් තැවුලට පත්වෙන්න එපා.


සබ්බ පාපස්ස අකරණං - සියලූ අකුසලින් දුරුවීම
කුසලස්ස උපසම්පදා - කුසල් කිරීම හා දියුණු කිරීම
සචිත්ත පරියෝදපනං - තමාගේ සිත පිරිසිදු කිරීම
ඒතං බුද්ධාන සාසනං - මෙය සියළු බුදුවරයන්ගේ අනුශාසනාවයි.

Wednesday, October 15, 2014

ඉසුරු පිරි යුගයකට නැනෝ තාක්ෂණය 01

2 comments


අළුතින් බ්ලොග් එක හැදුවට පස්සේ ඉස් ඉස්සෙල්ලම නැනෝ තාක්ෂණය ගැන ලියන්න හිතුනා. මොකද අපි හැමෝම ඒ ගැන දැන ගැනීම ගොඩක් වැදගත් වෙනවානේ. 

ඇත්තටම මොකක්ද මේ නැනෝ තාක්ෂණය කියන්නේ.. ?

නැනෝ කියන වචනයෙන් අදහස් වෙන්නේ "අඟුටුමිට්ටා" කියන අදහස. 

හැබැයි එහෙම සඳහන් වෙන්නේ ග්‍රීක භාෂාවේ. කොහොම වුනත් "නැනෝ" යන්නෙන් අදහස් වෙන්නේ කුඩා දෙයක් පිලිබඳවයි. විද්‍යාත්මකව නැනෝ කියන පදය යොදන්නේ බිලියනයකින් කොටසක් හැඳින්වීමටයි.

"NANO" කියන වචනය සිංහලෙන් හඳුන්වන්නේ "නිණිති" කියලා. මේ නැනෝ තාක්ෂණය එහෙමත් නැත්නම් නිණිති තාක්ෂණය කියලා කියන්නේ නැනෝ පරිමාණය මත ගොඩ නැගුනු තාක්ෂණයටයි. නැනෝ පරිමාණය කියලා කියන්නේ අපි දන්න මීටරය තියනවනේ.අන්න ඒ මීටරයකින් බිලියනයකින් කොටසක්. ඒ කියන්නේ 1M=10-9 . දැන් තේරේනවනේ නැනෝ කියලා කියන්නේ කොයි තරම් නම් කුඩා දෙයක්ද කියලා.
කෙටියෙන්ම කිව්වොත් නැනෝ තාක්ෂණය කියන්නේ නැනෝ මීටර් 1 සිට 100 දක්වා වු පරිමාණයට අයත් ද්‍රව්‍ය (නැනෝ අංශු) පිළිබදව අධ්‍යනය කිරීම, පරීක්ෂණ කිරීම, සංවර්ධන ක්ෂේත්‍ර වලට දායක කරගැනීම, ඒවා තුලින් සිදුකරනු ලබන නිෂ්පාදන ක්‍රියාවලි සියල්ලයි. 

එතකොට නැනෝ අංශු කියන්නේ නැනෝ භාවිතයෙන් සාදන අංශු වලට.මෙම අංශු භාවිතයෙන් තමා යම් යම් නිෂ්පාදන සාදන්නෙ. නමුත් නැනෝ අංශු පියවි ඇහැට තියා සාමාන්‍ය අන්වීක්ෂයකින් වත් අපිට දැකගන්න බෑ . මේවා දැකීමටනම් නැනෝ පරිමාණය යටතේ හදපු විශේෂ අන්වීක්ෂ වගේ උපකරණ ඕනි වෙනවා.මොකද ඒවා එතරම් පොඩි නිසා.මේ හේතුව නිසා ඉතා කුඩා , කාර්යක්ෂමතාව ඉතා ඉහළ භාණ්ඩ නිපදවීමට Nano තාක්ෂණය යොදාගන්න ලොව බොහෝ පිරිස් උනන්දු වෙනවා.

ඔයාලා දන්නවද කූඹියෙකුගෙ දිග 5,000,000 nm පමණ වෙන බව.?  


මිනිස් රතු රුධිරාණුවක් නැනෝමීටර් 7500 ක් පමණ වෙනවා එතකොට තේරෙනවනේ නැනෝ මීටරයක් කියල කියන්නේ ඇසටවත් නොපෙනෙන ඉතාමත් කුඩා දෙයක් බව


ඕනෑම ද්‍රව්‍යයක් නැනෝ මට්ටම දක්වා කුඩා කරන විට ඒවායේ භෞතික ගුණ වෙනස් වෙන්න පටන් ගන්නවා. ඒ කියන්නේ එවායේ ශක්තිය වැඩි වෙනවා. බර ඉතාමත් අඩු වෙනවා. තාප හා විද්‍යුත් සන්නායකතාවන්
වෙනස් ආකාර වලින් සිදු වෙන්න පටන් ගන්නවා. ඒ විතරක් නෙවෙයි,
මේ මට්ටමේදි ද්‍රව්‍ය වලට තමන්ගේ පාට පවා වෙනස් කරන්න පුළුවන්.

උදාහරණයක් විදිහට ගත්තොත් රත්තරන් වලට නැනෝ මට්ටමේදි
තමන්ගේ වර්ණය රතු හෝ නිල් බවට වෙනස් කරන්න පුලුවන්. ඉතින්
 විද්‍යාඥයෝ දැන් උත්සාහ ගන්නේ මේ වෙනස් වන භෞතික ගුණ ප්‍රයෝජනයට අරගෙන වඩා කාර්යක්ෂම, ශක්තිමත්,සැහැල්ලු සහ වේගවත් තාක්ෂණික මෙන්ම ඉංජිනේරුමය නිර්මාණයන් බිහි කිරීමටයි.
නැනෝ තාක්ෂණයේදී අනුගමනය කරන ප්‍රධාන පිළිවෙත් දෙකක් තිබෙනවා. ඒ තමයි Top -down  approach සහ Bottom -up approach Top -down  approach කියන්නේ ලොකු දෙයකින් පොඩි දෙයක් හදන එක. හරියට ලොකු ගලකින් කැබලි ඉවත් කරලා පිළිමයක් හදනවා වගේ.  Bottom -up approach කියන්නේ ඒකේ අනිත් පැත්ත. කුඩා දේවල් එකතු කරලා ලොකු දෙයක් හදන එක. ලොකු කිව්වට මේක තියෙන්නේ නැනෝ මීටර ප්‍රමාණයේ. නැත්නම් නැනෝ තාක්ෂණය වෙන්නේ නැහැනේ.  

ඔන්න දැන් නැනෝ කියන්නේ මොකක්ද කියලා ටිකක් හරි තේරුම් යන්න ඇතිනේ... තව ටිකක් තේරුම් ගන්න පුළුවන් මේ වීඩියෝ එක බැලුවම. දැන් මේක බලලා ඉන්නකෝ..

නැනෝ තාක්ෂණය නිසා අනාගතේ කොහොම වෙයිද කියලා තේරෙන්න ඇතිනේ මේ වීඩියෝවෙන්. ඒවා ගැන පසුව ලියන්නම්. නැනෝ තාක්ෂණය ගැන තව ගොඩක් දේවල් තියනවා.. දෙවැනි ලිපියෙන් හමුවෙමු එහෙනම්. හැමදෙනාටම බුදු සරණයි...... !

මගේ ස්කයිප් එක

Add me to Skype

Followers

Blogger news

lankeeya sithuwili